Төрийн цахим үйлчилгээний зохицуулалтын газар цахим үйлчилгээний хүртээмжийг нэмж, гадаад дахь иргэдэд төрийн үйлчилгээг түргэн шуурхай хүргэхээр БНСУ-д гурван байршилд “ХУРДАН” цэг ажиллуулж байна.

Монгол Улсын иргэд “ХУРДАН” цэгээс 43 байгууллагын 451 төрлийн үйлчилгээ авах боломжтой бөгөөд сүүлийн 3 жилд 3000 гаруй үйлчилгээ авчээ. “ХУРДАН” цэгийг одоогоор Монгол Улсаас БНСУ-д суугаа Элчин сайдын яам, Сөүл хотын Хөдөлмөр, нийгмийн хамгааллын үйлчилгээний төв, Пусан дахь Консулын хэлтэст байршуулаад байгаа билээ.

БНСУ дахь Хөдөлмөр, нийгмийн хамгааллын үйлчилгээний төвийн мэдээлснээр, энэ оны дөрөвдүгээр сарын 30-ны байдлаар тус улсад Монгол Улсын 56,403 иргэн сурч, ажиллаж амьдардаг. Тэдний 25,753 нь эрэгтэй, 30,650 нь эмэгтэй аж.