Гадаад харилцааны сайд Н.Энхтайван Монгол Улсаас хилийн чанадад суугаа 46 ДТГ-ын тэргүүн нартай өнөөдөр цахим уулзалт зохион байгуулав.

Уулзалтын үеэр Гадаад харилцааны сайд Н.Энхтайван 2020 онд гадаад харилцааны салбарт хийж хэрэгжүүлсэн ажлын талаар товч танилцуулж, гадаад бодлогын хэрэгжилтийг дүгнэж, 2021 онд салбарын өмнө тавьж буй зорилтуудын талаар дэлгэрэнгүй мэдээлэв.

Гадаад харилцааны сайд Н.Энхтайван “Алсын хараа-2050” урт хугацааны хөгжлийн бодлого болон Засгийн газрын үйл ажиллагааны 2020-2024 оны хөтөлбөрт гадаад харилцааны салбарт тусгасан зорилтууд, ГХЯ-ны 2020-2024 оны Стратеги төлөвлөгөөнд заагдсэн ажил, арга хэмжээнүүдийг цаг хугацаанд нь хэрэгжүүлэхээр одооноос идэвхийлэн ажиллахыг үүрэг болгов. Мөн гадаадын улс орнууд “COVID-19” цар тахлын үеийн хүндрэл бэрхшээлийг даван туулах, ард иргэдээ вакцинжуулах, эдийн засгийг сэргээх, гадаад худалдааг хэвийн горимоор ажиллуулах, цар тахалтай тэмцэж буй талаарх сайн туршлагыг судалж нэвтрүүлэхэд идэвхитэй ажиллахыг ДТГ-ын тэргүүнүүдэд үүрэг болгов.

Түүнчлэн энэ онд тохиож буй Тусгаар тогтнолоо сэргээн мандуулсны 110 жил,  Ардын хувьсгалын 100 жил, орчин цагийн Дипломат алба үүсэн байгуулагдсаны 110 жилийн ой, Монгол Улс НҮБ-ын гишүүн болсны 60 жил ойг тохиолдуулан ГХЯ-наас зохион байгуулах ажлын талаар санал солилцов.