АНУ ОХУ-ын америк долларын нөөцөөсөө гадаад төлбөр тооцоо хийх боломж олгож байсан хуулийн цоорхойг хаасны дараа Москва гадаад өрөө рублиэр төлнө гэдгээ мэдэгджээ. Америкийн сангийн яам Орост тавьсан санхүүгийн хориг арга хэмжээнээс зайлсхийх боломж олгож байсан хуулийн цоорхойг хааж байгаагаа мягмар гарагт зарласнаар Оросыг дефолт зарлах чиглэл рүү шахаж байна гэж олон улсын зарим хэвлэлд мэдээлжээ.

АНУ төлбөр тооцоо хийх зөвшөөрлийг сунгахаас татгалзсанаар Оросын засгийн газрын гадаад өрөө америк доллараар төлөх, бондын хүүгээ төлөх бололцоог хааж байна. Иймээс одооноос эхлээд өр зээлийг Оросын үндэсний мөнгөн тэмдэгт рублиэр хийнэ гэж Оросын сангийн сайд өчигдөр телеграм хуудсандаа мэдэгджээ.

Мөн төлбөр тооны тусгай суваг болдог Оросын санхүүгийн байгууллагыг ашиглан төлбөр тооцоог дараа нь анх авсан валют руу нь хөрвүүлэх боломж бий гэж Оросын сангийн яамнаас мэдэгджээ. Түүнчлэн Америкийн энэ шийдвэр Орост зээл олгодог гаднын хөрөнгө оруулагчдын эрхийг голчлон зөрчиж байна гэж Оросын сангийн яамны мэдэгдэлд дурджээ.

Оросын сангийн сайд Антон Силуанов одоогийн энэ байдал 1998 оны өрийн дефолттой харьцуулах боломжгүй. Бидэнд бэлэн мөнгө байна, өр зээлээ төлөх сонирхол байна. Энэ бол нөхөрсөг бус улсын зохиомлоор бий болгосон нөхцөл байдал гэж мэдэгдсэн байна.

Орост тавьсан Өрнөдийн хориг арга хэмжээний улмаас Оросыг олон улсын санхүүгийн системээс тусгаарласан, ялангуяа Москваг гадаад зээлдэгчид дээ өр зээлээ төлөхөд Америкийн банкуудад хадгалагдаж байгаа хөрөнгөө ашиглах бололцоог нь хязгаарласан юм.