"Ковид-19" цар тахлын нөлөөгөөр Энэтхэг улс олон улсад цагаачилж ажилладаг олон мянган иргэнээ татаж авахад хүрч байна. Тус улсын засгийн газар эх орондоо буцах хүсэлт гаргасан иргэдээ татаж авахын тулд өнгөрсөн 7 хоногт л гэхэд 64 удаагийн чартер нислэг үйлдсэн байна.
Өнөөдрийн байдлаар Энэтхэг улсын 17 сая гаруй иргэн дэлхийн олон оронд цагаачилж ажилладаг, тэдний дийлэнх хувь нь Арабын булангийн улс орнуудад ажилладаг юм байна. Цагаач ажилчид цалингийнхаа багагүй хувийг гэр бүлдээ шилжүүлдэг учраас тэд Энэтхэгийн эдийн засагт багагүй хэмжээний хувь нэмэр оруулдаг юм. 2018 оны статистик мэдээгээр Энэтхэгийн цагаач ажилчид эх орон руугаа 79 тэрбум америк доллар шилжүүлсэн нь тус улсын ДНБ-ий 2,7 хувийг бүрдүүлсэн байна. 

Гэвч цар тахал цагаач ажилчид авдаг улс орнуудын эдийн засагт сөрөг нөлөө үзүүлж, ажлын байрны цомхтгол хийхэд хүрч байгаа учраас Энэтхэгийн цагаач ажилчид хүний нутагт ажил орлогогүй болж, нутаг буцаж байна. Тухайлбал Арабын нэгдсэн Эмират улсад Энэтхэгийн 200 гаруй мянган иргэн эх орондоо буцах хүсэлт гаргасан байна. Мөн Энэтхэгийн засгийн газар хил дээр гацсан олон мянган иргэнээ татахын тулд Малдивын арлууд руу тэнгисийн хүчний хөлөг онгоцуудаа илгээсэн байна. Үүний зэрэгцээ хөрш Пакистанд эх Энэтхэгийн олон мянган цагаач ажилчин орон руугаа буцах хүсэлт гаргажээ.