Мэргэшсэн хөдөлмөрийн аюулгүй байдал, эрүүл ахуйн мэргэжилтнүүдийн холбоо, “Шинжлэх ухаан технологийн их сургууль”, “Монголын ажил олгогч эздийн холбоо, “Монголын үйлдвэрчний эвлэлүүдийн холбоо”, “Хөдөлмөр нийгмийн харилцааны дээд сургууль” хамтран “КОВИД-19 ба ХАБЭМ” уриан дор  “Нэн тэргүүнд ХАБ-2020” хурлыг өчигдөр болон өнөөдөр зохион байгуулж байна.

Уг арга хэмжээний нээлтэд Хөдөлмөр, нийгмийн хамгааллын сайд А.Ариунзаяа,  дэд сайд С.Зулпхар, Хөдөлмөрийн аюулгүй байдал, эрүүл мэндийн төвийн дарга М.Даваабат, тус төвийн Мэргэжлийн өвчин судлалын газрын дарга Д.Гангаамаа, Монголын ажил олгогч эздийн нэгдсэн холбооны дэд ерөнхийлөгч Х.Ганбаатар, Монголын үйлдвэрчний эвлэлийн холбооны Ерөнхий нарийн бичгийн дарга Г.Адьяа, уул уурхай болон бусад салбарын аж ахуйн нэгж, байгууллагын ХАБЭА-н асуудал хариуцсан ажилтнууд, сургалт, судалгааны байгууллагын төлөөлөл оролцов.

Уг хурлаар Хөдөлмөрийн аюулгүй байдал, эрүүл ахуйн эрх зүйн орчны шинэчлэл, өөрчлөлтийн болон зохицуулалтын шинэлэг мэдээлэл авахаас гадна аж ахуйн нэгж, байгууллагын ХАБ-ын асуудлаа шийдвэрлэж буй тэргүүн туршлага, үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх чиглэлээр нийгмийн түншлэгч байгууллагуудын байр суурийг сонсож, хэлэлцүүлэг өрнүүлж, цаашид хууль, эрх зүйн тогтолцоог улам боловсронгуй болгоход санал, зөвлөмж гаргах юм.

“Нэн тэргүүнд ХАБ” хурлыг Уул уурхай, хүнд үйлдвэрийн яам, Уул уурхайн үндэсний ассоциаци, уул уурхайн зарим компанитай хамтран 2012 оноос эхлэн зохион байгуулж ирсэн. Мөн энэ жилийн бага хурлыг Эрдэнэт, Дархан, Өмнөговь аймагт  цахим хэлбэрээр давхар зохион  байгуулжээ.

Ташрамд дуулгахад, Монгол Улсын Засгийн газрын 2020-2024 оны үйл ажиллагааны хөтөлбөрт “Аж ахуйн нэгж, хувиараа хөдөлмөр эрхлэгчдэд хөдөлмөрийн аюулгүй байдал, ариун цэвэр, халдваргүйн горимыг хангахад шаардлагатай мэдээлэл, сурталчилгаа хийх, сургалт зохион байгуулах замаар ажлын байраа хадгалах, орлоготой байх нөхцөлийг бүрдүүлэх” зорилт дэвшүүлсэн юм. Үүнээс гадна олон улсад “Vision zero буюу ослыг тэглэх алсын хараа” хөдөлгөөнийг хүчээ авч байна.