БНАСАУ байгуулагдсаны 73 жилийн ойгоо тохиолдуулан цэрэгжсэн болон нийгмийг аюулаас хамгаалах хүчний парад зохион байгуулжээ.

БНАСАУ-ын төрийн мэдлийн хэвлэл мэдээллийн хэрэгслийн мэдээлснээр, энэхүү үйл ажиллагаа Пёньян хот дахь Ким Ир Сений нэрэмжит талбайд пүрэв гаргийн үдэд эхэлсэн байна.

Энэхүү парадад ажилчин, тариачдын улаан гвардынхан тэргүүтэй бусад отрядууд оролцжээ. Харин Солонгосын Ардын арми оролцсон талаар мэдээлэл байхгүй байна.

Удирдагч Ким Жөн Ун парадыг өндөр албан тушаалтнуудын хамт үзэж сонирхсон боловч үг хэлээгүй бололтой байна. 
Эрх баригч Хөдөлмөрийн намын “Rodong Sinmun” сонинд гарсан гэрэл зургуудад баллистик пуужин гэх мэт том хэмжээ бүхий зэвсэг харагдаагүй байна.

БНАСАУ коронавирусний халдвар тархахаас урьдчилан сэргийлэхийн тулд хилээ хааж, худалдааг хязгаарласан нь эдийн засагт нь ихээхэн сөрөг үр дагаврыг учруулаад байна хэмээн шинжээчид үзэж байгаа юм.  

Харин энэхүү парад нь хямрал нүүрлээд буй үед ард түмнийг дайчлах замаар үндэсний эв нэгдлийг бэхжүүлэх хүчин чармайлтын нэг бололтой байна.