Улсын онцгой комиссын даргын 2020 оны гуравдугаар сарын 12-ны 6 дугаар тушаалаар Монгол Улсад коронвируст халдварын тохиолдол бүртгэгдсэнтэй холбогдуулан Засгийн газар, Улсын онцгой комиссын шийдвэрийн хэрэгжилтийг уялдуулан зохицуулах, нэгдсэн удирдлага зохион байгууллатаар хангах чиг үүрэг бүхий “Улсын онцгой комиссын шуурхай штаб”-ыг Онцгой байдлын ерөнхий газарт байгуулжээ. 

Шуурхай штабын даргаар ОБЕГ-ын дэд дарга, хурандаа Б.Ууганбаяр ажиллах бөгөөд холбогдох яам, агентлагийн төлөөллөөс бүрдсэн алба хаагчид ажиллах аж. Төрийн захиргааны байгууллага, нутгийн захиргааны байгууллага, олон улсын байгууллага, ард иргэд шуурхай штабаас гаргасан шинэ коронавируст халдвар тархахаас урьдчилан сэргийлэх, бэлэн байдлыг хангах, хариу арга хэмжээний талаарх үүрэг чиглэлийг мөрдөж ажиллана.

Эхний ээлжинд Улсын онцгой комиссын Шуурхай штабаас гаргасан шийдвэрийн дагуу БНСУ-аас эх орондоо ирэх иргэдэд зөвлөмж мэдээллийг гаргахаар ажиллаж байна.

БНСУ дахь иргэдийг 14 хоног тусгаарлах байр, хоолны зардал болох хоногийн 40000 төгрөг буюу нийт 560000 төгрөг /0-5 настай хүүхэд төлбөргүй/, 6-18 настай хүүхэд хоногийн 30000 төгрөг буюу нийт 420000 төгрөгийг тухайн иргэний ар гэрийнхэн нь Монголд Онцгой байдлын ерөнхий газрын дансанд урьдчилан шилжүүлж, төлбөрийг бүрэн барагдуулсны дараа онгоцны суудлыг баталгаажуулах, төлбөр хийгээгүй тохиолдолд бүртгэлээс хасч, төлбөрөө төлсөн дараагийн иргэнийг онгоцонд суулгах зэрэг зохицуулалтыг тусгахаар төлөвлөж байна.

Уг зөвлөмж мэдээлэл эцсийн байдлаар албажаагүй бөгөөд БНСУ-аас Монгол Улсад ирэх иргэд ямар шаардлагыг биелүүлэх, тусгаарлах байрны төлбөрийг ямар дансанд байршуулсан байх зэрэг мэдээлэл эцсийн байдлаар гараагүй аж.