БНХАУ-ын Шиамин хотод болсон 3х3 сагсан бөмбөгийн оюутны дэлхийн аварга шалгаруулах тэмцээнээс Монголын баг хүрэл медаль хүртэв.

Тэмцээнд манай улсаас гавьяат дасгалжуулагч С.Тулгын удирдлага дор оролцсон “Баянхайрхан Мон-Алтиус” багийн бүрэлдэхүүнд А.Батхуяг, Б.Алтангэрэл, У.Чингүүн, Л.Авирмэд нар багтсан юм. Манай залуу “В” хэсэгт Эквадорыг хожиж, Францад хожигдсоноор хэсгээрээ хоёрдугаар байраар шалгарсан.

Улмаар хасагдах шатанд Уганда, Хятадыг хожиж, Литвад хожигдов. Ингээд хүрэл медалийн төлөөх Хятадын шигшээг 22:19-оор дахин хожсоноор хүрэл медалийн тавцанд зогсох эрхтэй болсон юм.
Монголын баг тус тэмцээний иж бүрдэл медальтай болж байгаа бөгөөд ирэх оны долоодугаар сард Германд хөшгөө нээх Дэлхийн оюутны Универсиад наадамд оролцох эрхээ авчээ. Манай баг энэхүү тэмцээнээс 2017 онд мөнгө, 2018 онд алтан медаль хүртэж байлаа.