ТОКИО. /Kyodo/. Японы Ерөнхий сайд Абэ Шинзо коронавирусний халдвар нэмж тархахаас урьдчилан сэргийлэх үүднээс Токио, Осака болон өөр таван мужид тогтоосон онц байдлыг орон даяар болгон өргөжүүлэх шийдвэрийг пүрэв гарагт гаргажээ.

Ингэснээр 126 сая орчим хүн амтай бүх 47 мужид онц байдал зарласан бөгөөд Абэ Шинзогийн мэдэгдсэнээр, Засгийн газар бүх иргэнд 100 мянган иен буюу 930 ам.долларыг олгохоор болжээ. Халдвар тархаж болзошгүй байгаа тул муждаа онц байдал зарлахыг зарим захирагчид төв Засгийн газраасаа хүссэн ажээ.

“Би халдварын тархалтыг хязгаарлаж, удахгүй болох баярын амралтаар зорчих хөдөлгөөнийг бууруулах үүднээс бүх мужид онц байдал тогтоолоо” гэж Абэ Шинзо Засгийн газрын коронавирусний асуудал хариуцсан ажлын хэсгийн уулзалтын үеэр мэдэгджээ.

Хүмүүс хоорондын хавьтлыг хамгийн багадаа 70 хувь, цаашлаад 80 хувь хүртэл бууруулахад ирэх тавдугаар сарын 6 хүртэл үргэлжлэх онц байдал чухал ач холбогдолтой гэж тэрбээр хэлсэн байна. Дөрөвдүгээр сарын сүүлээс тавдугаар сарын эхэн хүртэл үргэлжилдэг баярын амралтаар Японы олон иргэн төрсөн нутагтаа очиж, аялж зугаалдаг ажээ. Энэ жилийн амралт тавдугаар сарын 6-нд дуусах юм.

Японд коронавирусний халдварын тохиолдлын тоо 10000 давсан /“Diamond Princess” хөлөг онгоцон дээр байсан 700 гаруй хүнийг оруулсан/ энэ үед хүмүүс муж дамнан чөлөөтэйгээр зорчих нь халдвар нэмж тархахад хүргэж болзошгүйд санаа зовниж буйгаа Абэ Шинзо илэрхийлсэн байна.