Монгол Улсын хэмжээнд өчигдөр коронавирусний халдварын сэжигтэй тохиолдол бүртгэгдээгүй хэмээн ХӨСҮТ-ийн ерөнхий захирал Д.Нямхүү өнөөдрийн хэвлэлийн хурлын  үеэр мэдээллээ.

ХӨСҮТ-ийн хоёр лабораторид өчигдөр 256, Дархан-Уул аймгийн лабораторид 59, нийт  315 хүнд шинжилгээ хийхэд коронавирус илрээгүй байна. Үүнд ХӨСҮТ-д 112, Цэргийн төв эмнэлэгт 2, ажиглах байранд тусгаарлагдсан 25 хүний давтан шинжилгээ коронавирусний халдваргүй гарчээ. Мөн Дорноговь аймгийн Замын-Үүд суманд тусгаарлагдсан 6, Сос медика монголиа эмнэлэгт 1, тандалтын зорилгоор цуглуулсан  110 хүний шинжилгээ багтжээ.

Тусгаарлалтын хугацаа нь дууссан 80 иргэнийг ХӨСҮТ-ээс гаргаж, ажиглах байранд байсан 154 хүнийг дараагийн ажиглалтад шилжүүлсэн байна. 

ХӨСҮТ дараагийн тусгай нислэгээр ирэх иргэдийг хүлээн авах байр, бэлтгэл ажлаа хангаж байгаа аж.