БНАСАУ хоёр Солонгосын холбоо тогтоох байрыг нураасан шалтгааныг задлан шинжлэхийн тулд АНУ, БНСУ-тай нягт хамтран ажиллана гэж Японы Засгийн газар мэдэгджээ. БНАСАУ мягмар гарагт хилийн Кэсон хот дахь холбоо тогтоох байхыг дэлбэлсэн юм. Өмнө нь Пёньян БНАСАУ-ын дүрвэгчдийг хил дамнуулан ухуулах хуудас тараахыг зөвшөөрсөн хэмээн Сөүлийг шүүмжлээд байсан юм. Пёньян уг байрыг нураахын өмнө урьдчилан анхааруулснаас үзэхэд уг явдал хоёр Солонгосын хооронд цэргийн томоохон мөргөлдөөн үүсэхэд хүргэх төлөвгүй байна гэж Японы Засгийн газрын төлөөлөгчид үзжээ. Уг анхааруулгыг БНАСАУ-ын удирдагчийн дүү Ким Ё Жон өгснийг зарим төлөөлөгч онцлон тэмдэглээд, түүний байр суурийг бататгахын тулд ийм үйлдэл хийсэн байж магадгүй гэж хэлсэн байна. Японы Засгийн газар Пёньяны зорилгыг шинжлэхийн тулд БНСУ, АНУ-ын гадаад хэрэг, батлан хамгаалахын бодлого хариуцсан төлөөлөгчидтэй хамтран ажиллахаар төлөвлөж байгаа ажээ. Мөн БНАСАУ өдөөн хатгасан үйлдлээ үргэлжлүүлсээр байх тохиолдолд бүс нутгийн хурцадмал байдал даамжирч болзошгүй тул Японы Засгийн газар сонор сэрэмжтэй байж, нөхцөл байдлыг хянахын тулд бүхий л хүчин чармайлтыг гаргахаар төлөвлөжээ.