Бразил улсын шүүх ерөнхийлөгч Жайр Болсонаруг олон нийтийн газарт явахдаа заавал амны хаалт зүүж байхыг тулгасан шийдвэр гаргажээ. Шүүхийн шийдвэрээр Бразилын ерөнхийлөгч болон төрийн албан хаагчид олон нийтийн үйл ажиллагаанд амны хаалтгүй оролцсон өдөр бүрийн тоогоор 2000 реал буюу 387 америк долларын торгууль төлөх юм байна. Бразилын ерөнхийлөгч Болсонару улс оронд нь цар тахлын дэгдэлт өндөр байгаа ч олон нийтийн үйл ажиллагаанд оролцохдоо амны хаалт зүүхгүй байгаа юм байна.

Иймд тус улсын шүүх улс орон удирдаж байгаа, үндэсний аюулгүй байдлыг удирддаг хүн эрүүл байх ёстой гэсэн үүднээс ерөнхийлөгчдөө албадан амны хаалт зүүлгэхээр шийдвэрлэжээ. Бразил улс нь "Ковид-19" цар тахлын халдварын тоогоор дэлхийд АНУ-ын дараа хоёрт бичигдэж байгаа юм. Тус улсад нийт 1,1 сая гаруй хүн коронавирусээр халдварлаж, 52 мянга гаруй хүн нас барсан байна.