БНАСАУ-ын удирдагч Ким Жөн Ун энэ оны эхний хагаст олны өмнө харьцангуй цөөн удаа гарч иржээ.

“БНАСАУ-ын төрийн мэдээллийн хэрэгслэл энэ оны 1-6 дугаар сард удирдагчийнхаа талаарх 20 үйл явдлын тухай мэдээллээ” гэж Токио хотод төвтэй “Radiopress” агентлаг мэдээлсэн байна.

Мөн БНАСАУ-ынхэвлэл мэдээллийн хэрэгслүүд 4-5 дугаар сард удирдагчийнхаа хаана байгаа талаар гурван долоо хоногийн турш буюу түүнийг тавдугаар сарын эхээр бордооны үйлдвэрийн нээлтийн ёслолд оролцох хүртэл огт мэдээлээгүй юм.

Ким Жөн Ун 2012 оноос төрийн эрхийг барьснаасаа хойш жилийн эхний зургаан сарын хугацаанд дунджаар 50 гаруй удаа олны өмнө гарч ирж байсан бол энэ жил хамгийн цөөн удаа олны өмнө гарч иржээ.

Пёньяны засаг захиргаа улс орондоо коронавирусний халдварын тохиолдол бүртгэгдээгүй гэж мэдээлсээр байгаа боловч хилийн чанадаас ирсэн хүмүүсийг тусгаарлах зэргээр халдвараас урьдчилан сэргийлэх арга хэмжээнүүдийг авч хэрэгжүүлсээр байгаа ажээ.

Ким Жөн Ун эрх баригч намын хуралд цахимаар оролцлоо гэж тус улсын төрийн мэдээллийн хэрэгсэл зургадугаар сард мэдээлсэн байна.

БНСУ-ын Тагнуулын агентлагийн мэдээлснээр, Ким Жөн Ун халдвар авах эрсдэлийг бууруулахын тулд олны өмнө цөөн гарч ирэх болжээ.