Монголын хөлбөмбөгийн түүхэнд бичигдэх нэгэн онцгой үйл явдал ням гарагт буюу 2020 оны наймдугаар сарын 30-нд боллоо.

Энэ өдөр “The Nemzeti Bajnokság 1 “буюу Унгарын хөлбөмбөгиийн дээд лигийн “Пушкаш Академи”- “Уйпешт” багуудын хооронд болсон тоглолтод “Пушкаш Академи” багийн гарааны бүрэлдэхүүнд Монголын залуу хөлбөмбөгч Ганболдын Ганбаяр гарч 63 минут тоглож, түүний баг энэ улирлын анхны тоглолтоо 3:2-оор хожин гараагаа сайхан эхлүүллээ.

Энэ бол Монголын хөлбөмбөгч Европын аль нэгэн улсын дээд лигид хийсэн анхны тоглолт /бүр гарааны 11-д/ тохиолдол болсон юм.

Г.Ганбаярын “Пушкаш Академиа” баг нь 2005 онд байгуулагдсан, харьцангуй шинэ баг боловч 2018 онд Унгарын цомын финалд шалгарч, 2019-2020 оны улиралд дээд лигтэй хүрэл медаль хүртэж, амжилт нь жилээс жилд ахиж буй шилдэг баг юм. Харин өрсөлдөгч “ Уйпешт” баг нь 1885 онд байгуулагдсан, Унгарын аваргад 20 удаа түрүүлж, Унгарын цомын аваргаар 10 удаа тодорч, Унгарын супер цомыг 3 удаа хүртсэн, түүх, амжилт арвин баг хэмээн спортын сэтгүүлч Ц.Энхтүвшин /Таван цагариг/ онцлон мэдээллээ.

Европ тивд, тэр тусмаа хөлбөмбөгийн уламжлал, түүх, хөгжлөөр олон улсад дээгүүрт ордог Унгарын дээд лигт анх тоглосон Г.Ганбаяртаа монголчууд өндөр амжилт хүсэж байна.