БНХАУ-д Монголоос нийлүүлж буй нүүрсний эрэлт өндөр байгаа аж. Уул уурхайн портал Mining цахим хуудаст дурдсанаар өнгөрсөн есдүгээр сард Монгол Улс нийт 1.29 сая тонн эрчим хүчний нүүрс экспортолжээ.

Ингэснээр Хятадын зах зээлд эрчим хүчний нүүрсний дөрөв дэх томоохон нийлүүлэгч боллоо.

Энэ нь өнгөрсөн сарынхаас 2.6 дахин, өнгөрсөн оны мөн үетэй харьцуулахад 4.3 дахин их дүн болж байна.

Коронавируст цар тахлын нөхцөл байдал, хилийн хориг зэргээс шалтгаалан Монголоос нийлүүлэх эрчим хүчний нүүрсний экспорт тавдугаар сард 130 мянган тонн хүртлээ буурч байсан юм.

Эрчим хүчний нүүрсний нийлүүлэлт ийнхүү нэмэгдэх болсны шалтгаан нь хоёр улсын хооронд хэрэгжиж буй “Ногоон гарц” хөтөлбөрөөс шалтгаантай аж.

Мөн Өвөр Монголын өөртөө засах орны томоохон уурхайнуудад дотоод хяналт шалгалт явуулж байгаатай холбоотойгоор олборлолт нь буурсантай ч холбон тайлбарлаж байна.

Эх сурвалж: Mining