БНСУ-ад шинэ төрлийн коронавирусийн халдварын тохиолдол эрчимтэй нэмэгдэж байгаатай холбоотойгоор тус улсаас манай улсад ирэх иргэдийг тусгаарлахаар болжээ.

Бусан-Улаанбаатарын онгоцоор өчигдөр /2020.02.20/ ирсэн зургаан оюутныг ХӨСҮТ-д тусгаарласан. Мөн энэ сарын 23-нд БНСУ-аас 100 монгол иргэн эх орондоо ирэхээр МИАТ компанийн онгоцны тасалбар авсан байна. Тэдгээр иргэдийг Улаанбаатарт ирэхэд нь 14 хоног тусгаарлах ажээ.  

Коронавирусийн халдвар тархсан бүс нутгаас ирж буй иргэдийг тусгаарлах эмнэлэг бэлдээд буй. Эхний ээлжид Цэргийн төв эмнэлгийн байрыг бүрэн чөлөөлж, 570 ор,  300 гаруй эмч, эмнэлгийн мэргэжилтэн ажиллуулахаар бэлтгэл хангаад байгаа юм.

Мөн коронавирусийн халдварын сэжиг илэрсэн тохиолдолд нийслэлийн хэмжээнд ХӨСҮТ, Цэргийн төв эмнэлэг, “Асралт мед”, ОБЕГ-ын харьяа Давтан сургалт, сэргээн заслын төвийг тусгайлан бэлтгэж, бэлэн байдлыг хангаад байна.