Лхагва гаргийн орой АНЭУ-ын Дубай хотын Жабаль-Али боомтод зогсож байсан худалдааны хөлөг онгоц дээрх чингэлгүүдийн нэг хүчтэй дэлбэрч, гал гарчээ.

Дубайн Засгийн газрын албан ёсны төлөөлөгч Мон аль-Марригийн мэдэгдсэнээр, чингэлэг дотор хурдан шатамхай бодис, материал байсан байна. Дэлбэрэлтийн үеэр хүний амь эрсдэж, бэртэж гэмтээгүй болохыг тэрбээр баталжээ. Одоогоор галыг бүрэн унтраасан байна. 

Дэлбэрэлтийн чимээ хот даяар сонсогджээ. Нүдээр үзсэн хүмүүсийн ярьснаар, дэлбэрэлт асар хүчтэй байсан бөгөөд дэлбэрэлтийн долгион боомтоос 15 км-ийн зайд мэдрэгдсэн байна. Гал унтраах ангиуд тэр даруй газар дээр нь ирж галыг унтраажээ.