БНАСАУ-ын Засгийн газар Ким Чен Ирийн нас барсны ойтой холбогдуулан иргэддээ 11 хоногийн турш инээх, согтууруулах ундаа хэрэглэхийг хориглосон тухай “Daily Mail” мэдээлжээ.

Түүнчлэн, гашуудлын хугацаанд олон нийтийн газар баяр баясгалантай, өөдрөг сэтгэл санааны байдлаа үзүүлэхийг мөн хоригложээ. Энэ бүх хязгаарлалт Ким Чен Ирийн нас барсны 10 жилийн ойг тохиолдуулан дурсгалын арга хэмжээнүүд зохион байгуулах үеэр үйлчлэх гэнэ.

Хойд солонгосчуудад арванхоёрдугаар сарын 17-нд буюу Ким Чен Ирийн нас барсан өдөр дэлгүүр хэсэхийг мөн хориглосон байна. Гашуудлын өдрүүдээр гэр бүлийн гишүүн нь нас барсан тохиолдолд чанга уйлахыг хориглосон бөгөөд оршуулгыг зөвхөн гашуудлын өдрүүдийн дараа хийхийг зөвшөөрсөн байна.

Эдгээр хязгаарлалтыг мөрдүүлэхийн тулд цагдаагийн тусгай анги байгуулж, хүмүүс гашуудан гуньж байгаа эсэхэд хяналт тавих аж.