И-спортын CS:GO /Counter-Strike: Global Offensive/ тоглоомын дэлхийн аварга шалгаруулах тэмцээн гэгддэг өндөр шагналтай "Major Championship" 2022 оны 5 дугаар сарын 9-нд эхэлнэ.

Тус тэмцээнд Монгол Улсаа төлөөлж "Team IHC" баг Австралийн "Renegades" багийг хожсоноор Ази-Номхон далайн бүсээ тэргүүлэн оролцохоор болсон байна. "PGL Major Antwerp 2022" нэрээр зохион байгуулж буй дэлхийн аваргын төлөөх тэмцээн Бельгийн Антверп хотноо 3 үе шаттайгаар 5 дугаар сарын 22-ыг хүртэл үргэлжилнэ. Эхний шат буюу "The Challengers Stage"-д 16 баг швейцар системээр тоглож шилдэг 8 нь "The Legends Stage" шатанд шалгарна.

Харин 2 дугаар шатанд аль хэдийн шалгараад байсан 8 багийн хамт нийт 16 баг швейцар системээр тоглож шилдэг 8 нь сүүлийн "The Champions Stage" шатанд шалгарах юм.

Одоогоор Монголын багаас гадна Бразилын "Mibr", "Imperial Esports", Нидерландын "Team Liquid", Америкийн "Complexity Gaming", Аргентины "9z Team" багууд The Challenger шатанд, Бразилын "FURIA Esports" баг Legends шатанд шалгараад байна.

2021 оны дэлхийн аварга буюу "PGL Major Stockholm 2021" тэмцээнд Украины "Natus Vincere" баг түрүүлсэн. Монголын багийн хожсон "Renegades" болон "Tyloo" багууд өнгөрсөн жилийн тэмцээнд оролцож байв.