ОХУ-ын Ерөнхийлөгч Владимир Путин Монгол Улсын Ерөнхийлөгч У.Хүрэлсүхийг энэ оны аравдугаар сард Оросын Казань хотноо болох БРИКС-ийн дээд хэмжээний уулзалтад оролцохыг урьжээ. Ирэх арга хэмжээ нь тус байгууллагын эгнээгээ тэлснээс хойш болж буй анхны дээд хэмжээний уулзалт юм гэж В.Путин Монгол Улсын Ерөнхийлөгч У.Хүрэлсүхтэй хийсэн хэлэлцээний эхэнд онцолсон байна. Тэрбээр хоёр улсын хамтын ажиллагааны асуудлыг хэлэлцэхийг санал болгожээ.

У.Хүрэлсүх БРИКС+ уулзалтад оролцох урилгыг хүлээн авсан байна.

БРИКС-ийн дээд хэмжээний уулзалт нь Казань хотноо аравдугаар сарын 22-24-нд болно. Одоогоор тус уулзалтад уригдсан 36 улсын төрийн тэргүүнээс 18 нь оролцохоо мэдэгдээд байгаа аж. 2006 онд Бразил, Орос, Хятад, Энэтхэг улсын байгуулсан тус байгууллагад 2011 онд Өмнөд Африкийн Бүгд Найрамдах Улс, 2024 онд Египет, Иран, АНЭУ, Саудын Араб, Этиоп зэрэг улс элсжээ. БРИКС-ийн орнуудад дэлхийн нийт хуурай газрын 34 хувь, хүн амын 45.2 хувь ногдож байна.