Австралийн Брисбен хотод хятад пүүл бильярд буюу Хэйболын багийн дэлхийн цомын анхдугаар тэмцээн болж, манай улсаас эрэгтэй, эмэгтэй тус бүр нэг баг өрсөлдлөө.

Нийт 865200 ам.долларын шагналын сантай энэхүү тэмцээнд эрэгтэй, эмэгтэй тус бүр 32 шилдэг баг оролцсон юм. Тэгвэл эрэгтэйчүүдийн ангилалд 28 орны 84 тамирчин өрсөлдсөнөөс Монголын баг алтан медалиар энгэрээ мялааж, төрийн дууллаа Брисбенд эгшиглүүлэв. Ингэснээр манай эрэгтэйчүүд дэлхийн цомд түрүүлж, аваргын цомыг анх удаа өргөж байгаа нь энэ. Тэд 75 мянган ам.долларын эзэд болов. Багийн бүрэлдэхүүнд Э.Тэмүүжин, Л.Дэлгэрдалай, Д.Дамдинжамц багтсан байна. Багийн анхлагч Э.Тэмүүжиний хувьд хэйболын спортоор ААШТ-д түрүүлсэн анхны тамирчин юм. Тэрбээр 2016, 2017 онд америк пүүл бильярдын өсвөрийн дэлхийн аварга шалгаруулах тэмцээнээс дараалан мөнгөн медаль хүртэж байлаа. Тус тэмцээний мөнгөн медалийг Солонгос, хүрэл медалийг Хятад, Сингапурын баг авчээ.