Энэхүү наадам нь монгол тэмээг сурталчлах, түүний ашиг шимийг эдийн засгийн эргэлтэд оруулах, аялал жуулчлалыг тэмээний соёл, спорттой уялдуулан хөгжүүлэх, соёлын өвийг түгээн дэлгэрүүлэхэд онцгой ач холбогдолтой юм. Наадмын хүрээнд дөрвөн насны хурдан тэмээний уралдаан, тэмээн харваа, тэмээн поло, тэмээн дээрээс шагай шүүрэх, буйл зорох, бурантаг томох, эмнэг тэмээний туйлаан зэрэг уламжлалт болон орчин үеийн тэмцээн, уралдаан болж, шилмэл буур, шилмэл ингэ, сайхан тэмээтэй ганган хосыг шалгаруулна. Мөн тэмээний сүү, цагаан идээ, ноос, арьсан бүтээгдэхүүний үзэсгэлэн худалдаа, өвлөн уламжлагчдын тусгай үзэсгэлэн гарч, тэмээний соёлыг олон нийтэд таниулж байна.

Тэмээчдийн V зөвлөгөөнөөр тэмээн соёлыг хадгалах, хамгаалах бодлого, уур амьсгалын өөрчлөлт, цөлжилтийн нөлөө, аялал жуулчлалыг тэмээн соёлтой уялдуулан хөгжүүлэх зэрэг асуудлыг хэлэлцэн, бодитой зөвлөмж, шийдэл гаргах юм. Сүүлийн жилүүдэд улсын хэмжээнд тэмээний тоо толгой тогтвортой өсөж, 2025 оны байдлаар 501 мянгад хүрсэн нь малчид, тэмээчдийн уйгагүй хөдөлмөр зүтгэлийн бодит үр дүн юм.