Шинэ коронавирусний тархалттай холбоотойгоор хэд хэдэн улс орон нутгийн болон бүх нийтийн сонгуулийг хойшлуулаад байгаа. Харин Өмнөд Солонгос улсын хувьд 4-р сарын 15-нд парламентын сонгуулийг төлөвлөгөө ёсоор зохион байгуулахаар байгаа юм. Өнөөдрөөс гадаад улсад амьдарч байгаа Өмнөд Солонгосын иргэдээс санал авах ажил эхэлж байна. 

Гадаад оронд ажиллаж, амьдарч байгаа Өмнөд Солонгосын иргэдийн дундах санал хураалт 6 өдрийн турш явагдах юм. Гэхдээ шинэ коронавирусний тархалттай холбоотойгоор эх орноосоо хол яваа олон мянган Өмнөд Солонгосчууд саналаа өгч чадахгүй гэдгээ илэрхийлжээ. Анхандаа 170 мянга гаруй хүн саналаа өгнө гэж тооцоолж байсан ч 50 гаруй улс дахь Өмнөд Солонгосын элчингийн газар санал хураалтыг хойшлуулсан байна. 

Харин Азийн ихэнх орон болон Австралид байрлаж байгаа Өмнөд Солонгосын иргэд сонгуулийн санал хураалтад аль хэдийн оролцож эхэлжээ. Тодруулбал,  Япон улсын  Токио, Осака тэргүүтэй 10 хотод  Өмнөд Солонгосын иргэдийн саналыг авах санал хураах төв нээгдсэн байна. Үүнээс гадна Бээжин, Хонконгоос гадна Хятадын 7 ч хотод амьдарч байгаа Өмнөд Солонгосчууд парламентын сонгуульд оролцож, саналаа өгч байна.