Япон улсын иргэн Монгол Улсад байх хугацаандаа амь насаа алдсан хэрэг өнгөрөгч долоо хоногт гарсан юм.

Нийслэлийн Баянзүрх дүүрэг, Үндэсний цэцэрлэгт хүрээлэнгийн орчимд байрлах “Park View” хотхонд байр түрээслэн амьдардаг байсан Японы иргэн, 95 настай эрэгтэй гаднаа ил харагдах гэмтэл шархгүй нас барсан байдалтай олдсон байна.  Хэргийг харьяаллын дагуу Баянзүрх дүүрэг дэх цагдаагийн нэгдүгээр хэлтэст шалгаж эхэлжээ.

Талийгаач нь эрүүл мэндийн улмаас хэвтрийн дэглэмд буюу бусдын асаргаанд байжээ. Түүний үхлийн шалтгааныг тодруулахаар цогцсыг задлан шинжилгээнд оруулаад байгаа ба одоогоор албан ёсны дүгнэлт гараагүй байна гэж эх сурвалж мэдээллээ.

Талийгаачийг амьд байхад нь гэрийн үйлчлэгч асардаг байсан тул хэрэгт холбогдуулан үйлчлэгчээс тайлбар, мэдүүлэг авч эхэлсэн байна.