ЭМЯ-наас ээлжит мэдээллээ өглөө. ХӨСҮТ-ийн захирал Д.Нямхүү өчигдөр шинжилсэн сорьцийн талаар мэдээлэл өглөө.

Тэрбээр “өчигдөр нийт 517 сорьцийг шинжилсэн. Ингэхэд 13 тохиолдол батлагдаж, нийт 161 боллоо. Эдгэрсэн 43 хүн дараагийн шатны хяналтад шилжсэн. Үүнээс тавдугаар сарын 26-нд Москва-Улаанбаатар чиглэлийн нислэгээр ирсэн 170 хүнээс нэг илэрсэн. Тавдугаар сарын 27-ны Алтанбулаг боомтоор орж ирсэн 340 хүнээс 12 илэрсэн. Үүний 10 нь оюутан байгаа юм. Илэрч буй тохиолдлын ихэнх нь оюутнууд байгаа. Оюутнууд хүний нутагт маш хүнд давааг туулж эх орондоо ирж байгаа гэдгийг та бүхэн ойлгоорой. Халдвар авсан оюутнуудын ихэнх нь 17-20 гаруйхан настай залуучууд байгаа. Тэднийг дотуур байраа чөлөөлж өгөхийг шаардах, байр сууцны хомсдолд орж хүнд нөхцлөөс ирсэн гэдгийг ойлгоорой. Тиймээс бид харин ч зөв хүнээ сонгож эх орондоо авчирсэн гэж дүгнэж байна. Эд нарыгаа эрт илрүүлж, эцэг эх ах дүү нарынх нь хажууд эмчилж байгаа нь сайхан ажил юм” гэлээ.

Мөн өнөөдрийн байдлаар ХӨСҮТ-д 160 гаруй хүн хяналтад байгаа аж. Тус эмнэлэг 250 хүний ор бэлдсэн гэдгийг Д.Нямхүү захирал онцолсон юм.