Ардчилсан намын Ерөнхий нарийн бичгийн дарга Ц.Баатархүү нар мэдээлэл хийлээ.

Ардчилсан намын Ерөнхий нарийн бичгийн дарга Ц.Баатархүү “Сонгуульд мөнгөөрөө биш мөрөөрөө өрсөлдөх уриалга гаргаж байна. Эрх барьж байгаа нам 60 тэрбум, ЖДҮ-гийн хулгайгаа, хүчингээ нуух гэж сөрөг хүчнийг гүтгэн харуулж байгаад харамсч байна. Хэн, хаанаас маш их мөнгө төлж гүтгэлэг явуулсныг бид олж мэдсэн. Бид хууль хяналтын байгууллагад хандана.

Харамсалтай нь АН-аас нэр дэвшсэн 76 хүнээс СЕХ бүртгээгүй гэдэг худал мэдээлэл тараасан. Тэгвэл СЕХ-ноос манай намаас дэвшүүлсэн бүх нэрсийг бүртгэсэн. Сонгуульд бүртгэх эсэх, хэн нэр дэвшихийг зөвхөн улс төрийн нам мэддэг юм биш. Төр захиргааны байгууллага эцэслэн шийдвэрлэдэг. Манай намын нэр дэвшигчид дунд авилга албан тушаалын гэмт хэрэгт холбогдож байсан хүн байхгүй. АН-ын нэр дэвшигчдийг гутаан доромжлох ажлаа зогсоохыг шаардаж байна" гэлээ.

Ийнхүү мэдээлэл хийсний дараа сэтгүүлчдийн асуултад хариулав.

-АН-ын хандивын данс нээгдсэн үү?

-АН-ын хандивын данс, нэр дэвшигчдийн хандивын данс нээгдсэн.

-АН-аас нэр дэвшсэн яг хэн гэдэг хүнийг хэрхэн гүтгэсэн юм бэ?

-АН-аас нэр дэвшсэн 10 гаруй хүнийг нэр дэвших эрхгүй авилга албан тушаалын хэрэгт холбогдсон гэх мэт гүтгэлэг тараасан. Хууль хяналтын байгууллага авилга албан тушаалын хэрэгт холбоогүй гэдэг талын лавлагааг гаргаж өгсөн.