Монгол Улсын гавьяат жүжигчин Б.Батзаяа нэрт зохиолч Н.Банзрагчийн “Сүүлчийн буун дуу” романаас сэдэвлэж, уран сайхны кино бүтээхээр ажиллаж байгаа гэнэ.

Одоогоор тус кино зохиолын ажил 50 хувьтай яваагаас гадна “хошин урлагийн нэвтэрхий толь” ном гаргахаар ажиллаж байгаа аж.

“Сүүлчийн буун дуу” роман нь Монголын түүхийн ээдрээт цаг үе болох Манжийн дарлалын үеийн Монголчуудын аж байдлыг өгүүлэхдээ Цэрэнбат, Дэлгэрбат хэмээх идэр насны ах дүү хоёрын хувь заяанд тухайн цаг үеийн байдал, хэрхэн нөлөөлж буйг дүрсэлдэг.

Хэдийгээр төрсөн ах дүү хоёр боловч цагаатан, улаантан хэмээх үзэл сурталд өөрийн мэдэлгүй автаж, зам мөр нь салж, эмгэнэлтэйгээр хагацаж байгаа ч зохиолын гол санаа нь ганц Монголчуудаас гадна нийт хүн төрөлхтөн үзэл суртал даган даамжирсаар бие биерүүгээ буу тулган хөнөөж байна гэсэн санааг илэрхийлдэг билээ.