“Рио-2016” олимпын наадмын хүрэл, ДАШТ-ий алт, мөнгөн медальт Шведийн тамирчин Женни Франссон өнгөрсөн жилийн Нур-Султаны ДАШТ-д эмэгтэйчүүдийн 68 кг-ын жинд мөнгөн медаль хүртсэн ч стероид метилтестостерон хоритой бодис хэрэглэсэн нь тогтоогдоод байгаа юм.

Дэлхийн бөхийн нэгдсэн холбооноос түүний барилдах эрхийг хэдий хугацаагаар хасах талаар шийдвэр одоогоор хараахан гаргаагүй байна.

Хэдийгээр 32 настай Франссон намайг хорлосон гэж үзэж байгаа ч Шведийн олимпын хороо (SOC)-ноос түүнийг Шведийн олимпын багаас бүрмөсөн хасаж байгааг өнгөрсөн баасан гаригт зарлав.

Хэрэв UWW-гаас түүний эрхийг хасах шийдвэрийг албан ёсоор зарласан тохиолдолд Монгол Улсын хөдөлмөрийн баатар, гавьяат тамирчин Соронзонболдын Батцэцэг ДАШТ-ий хошой алт, хошой мөнгөн медальтай болно.