Үндэсний их баяр наадамд өнгөрсөн жил түрүүлж, аварга цол хүртээд байсан Э.Оюунболд сэргээш хэрэглэсэн нь Допингийн үндэсний төвийн шинжилгээгээр баталгаажсан ч үл зөвшөөрч, Захиргааны хэргийн давж заалдах шатанд гомдол гаргасан байсныг саяхан хэлэлцээд барилдах эрхийг нь нэг жилээр хасах, аварга цолыг нь хураах, өвдөг шороодсон бөхчүүдийн давааг ахиулж, цол, чимгийг олгуулах шийдвэр гаргасан билээ.

Иймээс сэргээшийн золиос болсон бөхчүүд цол, чимэг нэмэх боломж бүрдээд байна. Хэдийгээр шүүхээс шийдвэр гарсан ч Монгол Улсын Ерөнхийлөгч Х.Баттулга зарлиг гаргавал дараах бөхчүүдийн цол, чимэг нэмэгдэнэ.

Ингээд Э.Оюунболдод хэн хэн хэд хэдийн даваанд өвдөг шороодсоныг уншигч танаа эргэн сануулья.

• Нэгийн даваанд: Хэнтий аймгийн залуу бөх М.Баярбаатар,
• Хоёрын даваанд: Сэлэнгэ аймгийн харьяат, аймгийн начин Т.Лхагвасүрэн,
• Гурвын даваанд: Төв аймгийн харьяат, аймгийн харцага М.Жамсрандорж,
• Дөрвийн даваанд: Завхан аймгийн Алдархаан сумын харьяат, аймгийн арслан П.Батсүх,
• Тавын даваанд: Баян-Өлгий аймгийн Дэлүүн сумын харьяат, аймгийн арслан Н.Мустафа,
• Зургаагийн даваанд: Өвөрхангай аймгийн Зүүнбаян-Улаан сумын харьяат, тухайн жилдээ шинэхэн улсын начин болсон Б.Цэдэнсодном,
• Долоогийн даваанд: Дорнод аймгийн Дашбалбар сумын харьяат, тухайн жилдээ шинэхэн улсын харцага болсон Д.Анар,
• Наймын даваанд: Хөвсгөл аймгийн Тосонцэнгэл сумын харьяат, улсын арслан Ц.Содномдорж,
• Есийн даваанд: Увс аймгийн Ховд сумын харьяат, улсын аварга Н.Батсуурь нар юм. Тиймээс шүүхийн шийдвэрийг үндэслэн Ерөнхийлөгч Х.Баттулга зарлиг гаргавал аймгийн арслан Н.Мустафа Монгол Улсын начин, Улсын начин Б.Цэдэнсодном Монгол Улсын харцага, Улсын харцага Д.Анар Монгол Улсын заан, Улсын арслан Ц.Содномдорж Үлэмж бадрах чимэг,  Улсын аварга Н.Батсуурь Монгол Улсын Даян аварга цолны эзэн болох юм.