Германд коронавирусний халдварын тархалттай холбогдуулан авч хэрэгжүүлж буй арга хэмжээнүүдийг эсэргүүцсэн жагсаалын үеэр цагдаа нар 300 жагсагчийг баривчилжээ.

Берлин хотод бямба гарагт болсон жагсаалд 38 мянга орчим хүн оролцжээ. Цагдаа нарын мэдээлснээр, зарим хэсэгт эмх замбараагүй байдал үүссэн байна.

Европт халдварын тохиолдлын тоо нэмэгдэж, олон нийт халдварын тархалтыг хязгаарлах чиглэлд авч хэрэгжүүлж буй арга хэмжээнүүдийн эсрэг эсэргүүцлээ илэрхийлж буй үед уг жагсаал болжээ. Мөн Парис, Лондон зэрэг хотод бямба гарагт ижил жагсаал болжээ.

“Жагсагчид аюулгүй байдлын дүрэм журмуудыг мөрдөөгүй тул баривчлахаас өөр сонголт бидэнд байгаагүй” гэж Берлин хотын Цагдаагийн газар “Twitter” хуудсаараа дамжуулан мэдэгдсэн байна.

Бранденбургийн хаалганы ойролцоо болсон жагсаалын үеэр зарим хүн чулуу, лонх шиджээ. Дотоод хэргийн сайд Андреас Гейзелийн мэдээлснээр, цагдаа нар уг жагсаалын үеэр 200 орчим хүнийг баривчилсан байна. Мөн долоон цагдаа гэмтжээ. Берлинд жагсаал хийхийг хориглоод байсан боловч Германы бүс нутгийн шүүх уг шийдвэрийг хүчингүй болгосон ажээ.

Герман улс нь Европын бусад оронтой харьцуулахад коронавирусний халдварын эсрэг арга хэмжээнүүдийг сайтар хэрэгжүүлж байгаа бөгөөд тус улсад өнөөдрийн байдлаар 9000 гаруй хүн халдварын улмаас нас баржээ. Гэсэн хэдий ч сүүлийн долоо хоногуудад халдварын тохиолдлын тоо бусад орны нэгэн адил нэмэгдэх болжээ.

Ташрамд дурдахад, бямба гарагт Парист амны хаалт зүүхийг эсэргүүцсэн жагсаал, Лондонд хязгаарлалтын арга хэмжээнүүдийг зогсоохыг шаардсан жагсаал тус тус болжээ. Мөн Вена, Цюрих хотод тайван жагсаал өрнөсөн байна.