Зэвсэгт хүчний Хуурай замын цэргийн командлагч, бригадын генерал Б.Амгаланбаатар 9 дүгээр сарын 8-ны өдөр Зэвсэгт хүчний 326 дугаар ангид ажиллалаа.

Тус ангийн захирагч, хурандаа С.Батболд энэ онд тохиож буй "Зенитийн холбоо" ТББ-ын үүсэн байгуулагдсаны 10 жилийн ой, 2021 онд онд тохиох орчин цагийн Зэвсэгт хүчин үүсэн байгуулагдсаны 100 жил ойг угтаж хэд хэдэн бүтээн байгуулалтын ажил өрнүүлж буйгаа танилцуулав.

Мөн тэрээр өвөлжилтийн бэлтгэлийг хангах хүрээнд хийж буй ажлуудаа танилцуулаад ангийн бэлэн байдал, бэлтгэлжилт болон сургалт, бэлтгэлээ дээшлүүлэхэд авч хэрэгжүүлж буй арга хэмжээний талаар ярилаа.

Бригадын генерал Б.Амгаланбаатар өвөлжилтийн бэлтгэлээ эрчимжүүлэх, 2020 оны хоёрдугаар ээлжээр хугацаат цэргийн албанд татагдах залуусыг хүлээн авахад бэлтгэх, бие бүрэлдэхүүнийхээ сахилга, хариуцлагыг дээшлүүлж, үүрэг гүйцэтгэлтийг нь нэмэгдүүлэхэд анхаарах зэрэг цаг үеийн асуудлаар үүрэг чиглэл өгсөн юм.

Эх сурвалж: ЗХЖШ