Франкфурт-Улаанбаатар чиглэлийн тусгай үүргийн онгоц өнөөдөр 06:04 цагт “Буянт-Ухаа” олон улсын нисэх буудалд газардсан.

Тус онгоцоор 240 иргэн эх орондоо ирсэн бөгөөд иргэдийг учир шалтгаанаар нь ангилан үзвэл, бага насны хүүхэдтэй гэр бүл-40, өндөр настан-12, эрүүл мэндийн шалтгаантай-21, бусад шалтгаантай-167 иргэн байгаа юм.

Иргэдийг ХӨСҮТ, Цэргийн төв эмнэлэг, Ворлд Монголиа, Би Жи зочид буудал, Баянбайгаль амралтын газарт тусгаарлахаар төлөвлөөд байсан.

Гэтэл өнгөрсөн шөнө орсон усархаг аадар борооны улмаас Төв аймгийн  Батсүмбэр сум орчмоор үер бууж, авто замаар зорчих боломжгүй болсон тул Баянбайгаль амралтын газар  тусгаарлагдах иргэдийг “Вензоу” зочид буудалд байрлуулах зохицуулалтыг хийжээ. Гэтэл иргэд "Вензоу" зочид буудалд буухгүй, бясаа жоомтой зочид буудалд буулгах гэлээ" хэмээн автобусандаа суулт зарлажээ. Гурван цагийн турш автобусандаа суусан зорчигчдыг цагдаа нарын оролцоотойгоор зочид буудалд байрлуулсан байна.

“Вензоу” зочид буудал нь дөрвөн удаагийн нислэгээр ирсэн 419 иргэний тусгаарлалтыг хүлээн авсан бөгөөд дараагийн захиалгат нислэг буюу өнөөдрийн /2020.09.15/   Сөүл-Улаанбаатар чиглэлийн зорчигчдыг хүлээж авахаар бэлтгэл хангаад байсан аж.