Иргэнийг нь АНУ- д шилжүүлэн өгөх тухай шийдвэртэй холбогдуулан Малайзтай дипломат харилцаагаа тасална гэдгээ БНАСАУ мэдэгджээ.

Солонгосын төв цахилгаан мэдээний агентлагийн мэдээлснээр, Малайзын ийнхүү шийдвэр гаргасны үр дагавар нь Вашингтонд ирнэ гэдгийг БНАСАУ-ын эрх баригчид анхааруулсан байна.

Өмнө нь Малайзын Дээд шүүх олон улсын хориг арга хэмжээг тойрч мөнгө угаасан, Пёньян руу тансаг бараа нийлүүлсэн хэрэгт сэжиглэгдэн АНУ руу шилжүүлэгдэх ёстой байсан БНАСАУ-ын иргэний давж заалдах гомдлыг хүлээж авахаас татгалзжээ.

Өдгөө 54 настай Мүн Чве Мён эхнэр, хоёр охины хамт Малайз улсад 10 гаруй жил амьдарчээ. Түүнийг шилжүүлэн өгөх тухай Холбооны мөрдөх товчооны хүсэлтийг Малайзын шүүх 2019 оны 12 дугаар сард дэмжин хүлээж авсан байна. Ингэхдээ Умард Солонгосын иргэнийг ямар бараа бүтээгдэхүүний нийлүүлэлт хийсэн талаар тодорхой мэдээлэл өгөөгүй аж. Харин Мүн Чве Мёны өмгөөлөгч мэдэгдэхдээ, энэ нь дал модны тос, шар буурцаг БНАСАУ руу экспортолсонтой холбоотой асуудал юм гэжээ.