Олимпын аварга, Хөдөлмөрийн баатар Н.Түвшинбаяр өнгөрсөн амралтын өдөр Монгол Улсын начин Э.Энхбатыг зодож хүнд гэмтээсэн хэрэг гарсан билээ. Хэргийг Хан-Уул дүүргийн Цагдаагийн I хэлтэст шалгаж байгаа бөгөөд хэрэгтэн Н.Түвшинбаярыг ШШГЕГ-ын харьяа Цагдан хорих 461 дүгээр ангид өнгөрсөн шөнө саатуулсан байна. 

Үүнтэй холбогдуулан ЦЕГ-аас өнөөдөр /2021.04.05/ хэвлэлийнхэнд мэдээлэл өглөө. Энэ үеэр тус газрын Хэвлэл мэдээллийн төвийн дарга, хурандаа Б.Баатархүү "Хөдөлмөрийн баатар Н.Түвшинбаярыг яллагдагчаар татаж, эрүүгийн хэрэг үүсгэх саналаа прокурорт хүргүүлсэн. Холбогдох гэрчүүдээс тайлбар авсан. Н.Түвшинбаяраас өмгөөлөгчийг нь байлцуулж мэдүүлэг авсан. Түүний гэмтлийн зэргийг нь тодорхойлохоор шүүх эмнэлэгт хандсан" гэх тайлбарыг өгсөн юм. 

Хөдөлмөрийн баатар Н.Түвшинбаярт Эрүүгийн хуулийн 11.1-т зааснаар эрүүгийн хэрэг үүсгэж, яллагдагчаар татах саналаа прокурорт хүргүүлжээ. Уг хуулийн заалтад тусгаснаар Н.Түвшинбаяр гэм буруутай нь тогтоогдох аваас 40 сая төгрөгөөр торгуулна, эсвэл 2-8 жилийн хорих ял сонсох юм.