Монгол Улс, Япон Улсын хооронд дипломат харилцаа тогтоосны 50 жилийн ой 2022 онд тохиож буйтай холбогдуулан ойн лого-г шалгаруулах уралдааныг зарлаж, шилдэг загварыг шалгаруулав.

Тус уралдаанд нийт 143 иргэн идэвх санаачилгатай оролцож, бүтээлч лого загварын санал ирүүлснээс Монгол Улсын иргэн Б.Балдоржийн зохиомж бүхий лого загвар Монгол, Японы лого сонгон шалгаруулах хорооны гишүүдийн олонхын саналыг авч, тэргүүн байр эзлэв.

Зохиогч нь лого-ны цагаан сууриар хоёр улсын ард түмний найрсаг харилцаа сүүн цагаан сэтгэлээр өргөжин дэлгэрэхийг ерөөж, энх тайван, эв нэгдэл, амар амгаланг бэлгэдэн цэнхэр өнгөөр “50”-ийн тоог тодотгон бичиж, түүний дотор хоёр орны далбааг “хязгааргүй”-н тэмдэгт байршуулсан нь Монгол, Японы “Стратегийн түншлэл”, ард түмний найрамдал нөхөрлөл өнгөрсөн, одоо, ирээдүйд тасралтгүй өргөжин бэхжихийг бэлгэдэн дүрсэлсэн ажээ.

Уралдааны дэд байранд Япон Улсын Канагава мужийн иргэн Таширо Аянэ, тусгай байранд Ишикава мужийн иргэн Мацүмото Рэна, Мүрозүка Момока нарын бүтээл тус тус шалгарав