Авто тээврийн үндэсний төвөөс нийгмийн хариуцлагын хүрээнд иргэний эрх, үүргээ ухамсарлан эрсдэлтэй бүс нутгаас ирсэн иргэдийг аюулгүй тээвэрлэсэн аж ахуйн нэгж байгууллагын хамт олон, жолооч нар болон тэдний ар гэрийнхэнд нь баярласнаа илэрхийллээ.

Дэлхийн олон оронд шинэ төрлийн коронавирус /COVID-19/ халдварт өвчин тархаж, Монгол Улс өндөржүүлсэн бэлэн байдалд шилжсэнээс хойш хоёр сар гаруй хугацаанд Засгийн газар болон Улсын Онцгой Комиссын хуралдаанаас гарсан тогтоол, шийдвэрийг шуурхай хэрэгжүүлэн Монгол Улс иргэдийнхээ эрүүл мэнд аюулгүй байдлыг хамгаалах зорилгоор шаардлагатай бүхий л арга хэмжээг авч ажиллаж байна.

Улсын Онцгой комиссын хуралдаанаас гадаад улсад суугаа Монгол Улсын иргэдийг зөвхөн агаарын тээврээр Буянт ухаа боомт, төмөр зам, авто замын тээврээр Дорноговь аймгийн Замын-Үүд боомт, Сэлэнгэ аймгийн Алтанбулаг боомтуудаар нэвтрүүлэхээр шийдвэрлэсэн.

Уг шийдвэрийн дагуу тус үйлдвэрийн газар нь “Атибус” ХХК, “Автобус тав” ХХК, “Зэлтэрийн зам” ХХК, “Тахилт транс” ХХК, “Хараацайн жигүүр” ХХК “Эрдэм транс” ХХК, “Чингүн хурд транс” ХХК-иудтай хамтран Нийслэлийн эрүүл мэндийн газраас гаргасан “Халдваргүйжүүлэлт хийх түр заавар”-ын дагуу ариутгал халдваргүйжүүлэлт хийгдсэн тээврийн хэрэгсэл, иж бүрэн хамгаалалтын хувцсаар жолоочийг ханган эрсдэлтэй бүс нутгаас ирсэн иргэдийг тусгаарлах байруудад тээвэрлэх ажлыг зохион байгуулсан гэж АТҮТ-өөс мэдээллээ.