Улсын хилээр орж ирсэн зарим бараа материалыг нэг бүрчлэн шалгаж байгаа нь иргэдэд хүндрэл учруулж байгаа талаар сошиал сүлжээнд нэлээд шүүмжлэл дагуулж байна. Сүүлийн гурван жил коронавирусний халдвараас үүдэн хил гааль асуудалтай байсан. Тэр тусмаа Замын-Үүд Эрээний боомт түр хугацаагаар хаагдаж, чингэлэг тээвэрч шилжсэн нь олон ч бэрхшээлийг дагуулаад байгаа юм. Тэгвэл ямар учраас зарим бараа материалыг нэг бүрчлэн шалгаж байгаа талаар Гаалийн ерөнхий газраас дараах тайлбарыг өглөө.

 Гаалийн ерөнхий газрын статистик мэдээллийн хэлтсийн дарга Э.Лхагвасүрэн "Гаалийн хяналт шалгалтад үндсэн гурван төлөв байдаг. Ногоон, оранж, улаан гэсэн. Улаан төлөвтэй нөхцөлд 100 хувь шалгалт хийнэ. Ногоон төлөвтэй нөхцөлд бичиг баримтын шалгалт хийнэ. Сошиал дээр цацагдаж буй зургаас харахад хориглосон хязгаарласан бараа оруулж ирэхийг завдсан байж болзошгүй мэдээлэл дээр үндэслэж шалгалт хийнэ. Тухайлбал, хар тамхи, буу, сум гэх мэт бараа оруулж ирсэн байж болзошгүй нөхцөл дээр тийм шалгалт хийж байгаа" гэлээ.