Монгол Улсаас БНСУ-д суугаа Онц бөгөөд Бүрэн эрхт Элчин сайд Э.Сарантогос энэ сарын 14-ний өдөр Солонгосын Хобан группийн Ерөнхийлөгч Ким Сонь Гюү болон тус группийн харьяа “Тэхан кабель энд солюшн” компанийн гүйцэтгэх захирал На Хён Гюнь нартай уулзаж, Монгол, Солонгосын бизнесийн хамтын ажиллагааг өргөжүүлэх боломжийн талаар ярилцав. 

 Монгол Улсын Ерөнхий сайд Л.Оюун-Эрдэнэ БНСУ-д энэ оны 2 дугаар сард айлчлах үеэр зохион байгуулсан Бизнес форумын үеэр манай улсад хөрөнгө оруулах боломжийн талаарх дэлгэрэнгүй мэдээллийг авч, бизнесийн хамтын ажиллагааг өргөжүүлэн хөгжүүлэх талаар илүү нухацтай бодолцож, судалгаа хийж байгаагаа тус группийн Ерөнхийлөгч танилцуулав. 

Элчин сайд Э.Сарантогос Монгол Улс дахь хөрөнгө оруулалт, бизнесийн орчин, нэн ялангуяа БНСУ-ын хөрөнгө оруулагчдад ямар давуу тал, боломж байгааг танилцуулаад БНСУ-д нэр хүнд бүхий, дэлхийд танигдсан “Хобан” групп болон хилийн чанадад бизнесийн өргөн үйл ажиллагаа явуулдаг “Тэхан кабель энд солюшн” компани уул уурхай, хүнд үйлдвэрлэлийн салбарт манай улстай урт хугацаанд харилцан ашигтай хамтын ажиллагааг хөгжүүлж, БНСУ-ын хөрөнгө оруулагчдыг бүтээн байгуулалтаараа түүчээлж ажиллана гэдэгт найдаж байгаагаа илэрхийлэв. 
 .

Монгол Улсын Гадаад Харилцааны Яам