СӨҮЛ. /Yonhap/. "БНСУ-ын Умард Гёнсан мужийн Гүми хот дахь манай компанийн үйлдвэрийн ажилтнаас шинэ коронавирусний халдвар илэрсэн" гэж “Samsung” компани өнөө өглөө мэдээллээ. Гэсэн хэдий ч уг үйлдвэрийн үйл ажиллагаа хэвийн үргэлжилж байгаа аж.

“Халдвар авсан ажилтан өнгөрсөн хоёрдугаар сарын 28-наас хойш өөрийгөө тусгаарласан. Гүми хотын ухаалаг гар утасны үйлдвэрийн үйл ажиллагааг зогсоохгүй” гэж тус компанийн төлөөлөгч мэдээлсэн байна.

БНСУ-ын халдварын голомт болох Дэгү хотоос 50 орчим километр зайд оршдог Гүми хотын үйлдвэрт “COVID-19” халдварын тохиолдол бүртгэгдсэн талаар “Samsung” компани долоо дахь удаагаа мэдээлж буй нь энэ юм.

Гүми хот дахь үйлдвэрийн ажилтнуудаас халдвар илэрсэнтэй холбогдуулан “Samsung” компани уг үйлдвэрийнхээ үйл ажиллагааг сүүлийн хэдэн долоо хоногийн хугацаанд хэд хэдэн удаа зогсоожээ. Тус компани дахин саатал үүсэхээс урьдчилан сэргийлэх үүднээс зарим ухаалаг гар утасныхаа үйлдвэрлэлийг Вьетнам руу шилжүүлэх шийдвэрийг энэ сарын эхээр гаргасан байна.

Үүний зэрэгцээ шинэ коронавирусний цар тахлын улмаас “Samsung” тэргүүтэй ухаалаг гар утас үйлдвэрлэгч компаниудын нийлүүлэлт энэ оны хоёрдугаар сард огцом буурчээ.

“Strategy Analytics” фирмийн мэдээлснээр, дэлхийн ухаалаг гар утасны өнгөрсөн сарын нийлүүлэлтийг өмнөх оны мөн үетэй харьцуулахад 38 хувиар буурч, 61.8 сая ширхэгт хүрсэн нь ухаалаг гар утасны зах зээлийн түүхэнд байгаагүй хамгийн их бууралт болжээ.