Сангийн сайд Б.Жавхлан мэдээлэхдээ, "Экспорт нэмэгдүүлж, тулгамдаж буй асуудлыг шуурхай шийдвэрлэх үүрэг бүхий ажлын хэсэг банкны салбарын төлөөлөлтэй уулзаж, гадаад валютын улсын нөөцийг хамгаалах чиглэлд хамтран ажиллах талаар хэлэлцэж, Санхүүгийн тогтвортой байдлын зөвлөлийн хурлаар холбогдох асуудлыг шийдвэрлэж, бодлогын зөвлөмж гарган ажиллаж байна. Нэгдүгээр улирлын нийт дүнгээр нүүрс 17.4 сая.тонн, төмрийн хүдэр 1.8 сая тонн экспортолсон нь өмнөх оны мөн үеийнхтэй ижил түвшинд байгаа бол зэсийн баяжмалын экспорт 456 мянган тоннд хүрч 24 хувиар өссөн. Энэ сарын нэгний байдлаар гадаад валютын улсын нөөц өмнөх долоо хоногийнхоос 305 сая ам.доллароор нэмэгдлээ.

Энэ нь нөөц эл хэмжээнд хүрсэн гурав дахь тохиолдол болж байна. Цаашид энэхүү үзүүлэлтийг тогтвортой хамгаалж, нөөцийг нэмэгдүүлэх бодлого баримтална. Оны эхний улиралд зэсийн экспортын хэмжээ өнгөрсөн оныхтой харьцуулахад биет хэмжээгээр 40 хувиар өссөн. Үүнийг дагаад татварт төвлөрүүлдэг орлого ч нэмэгдсэн. Өөрөөр хэлбэл нүүрсний алдагдлаа зэсээр нөхөж байна гэсэн үг. Хоёрдугаар улиралд бүтээн байгуулалт эхэлнэ. Энэ үед орлого тодорхой хэмжээнд идэвхжиж, эдийн засагт эерэг нөлөө үзүүлдэг тул Засгийн газраас шууд төлөвлөж, эрэмбэлж болох хөрөнгө оруулалт, урсгал зардлууд дээр онцгой анхаарна" гэв.