БНСУ болон Монгол Улс харилцан ашигтай эдийн засгийн хамтын ажиллагааг хөгжүүлэх хүчин чармайлтын хүрээнд Иж бүрэн эдийн засгийн түншлэлийн хэлэлцээр (CEPA) байгуулах асуудлаарх зургаа дахь шатны хэлэлцээг энэ долоо хоногт эхлүүлнэ гэж БНСУ-ын Худалдаа, аж үйлдвэр, эрчим хүчний яам мэдээлжээ. 

Тус яамнаас мэдээлснээр, хоёр улс шинэ шатны хэлэлцээгээ лхагва гарагт Улаанбаатар хотноо эхлүүлэх бөгөөд гурван өдрийн турш үргэлжилнэ. CEPA нь зах зээлийг нээхээс гадна, эдийн засгийн хамтын ажиллагаа, солилцоог өргөн хүрээнд чухалчилдаг чөлөөт худалдааны хэлэлцээрийн нэг төрөл юм.

CEPA байгуулах хэлэлцээг хоёр улс 2023 оны 12 дугаар сард эхлүүлсэн бөгөөд худалдаа, үйлчилгээ, хөрөнгө оруулалт, эдийн засгийн хамтын ажиллагаа зэрэг өргөн хүрээний асуудлаарх байр суурийн зөрүүгээ үе шаттайгаар арилгасаар иржээ.

Энэ удаагийн хэлэлцээний үеэр хоёр тал бараа бүтээгдэхүүн болон гарал үүслийн журмын асуудалд онцгойлон анхаарна гэж Худалдааны яамнаас тодотгосон байна.

CEPA-г эцэслэн байгуулж, хэрэгжүүлж эхэлснээр хоёр улсын худалдаа, хөрөнгө оруулалт нэмэгдэхээс гадна дэд бүтэц, өргөн хэрэглээний бараа бүтээгдэхүүн зэрэг олон салбарт нийлүүлэлтийн сүлжээ, аж үйлдвэрийн хамтын ажиллагаа улам бэхэжнэ гэж тус яамны мэдэгдэлд дурджээ.