Улсын онцгой комиссын Шуурхай штабаас өнөөдөр цаг үеийн асуудлаар мэдээлэл хийлээ. Мэдээллийг Гадаад харилцааны сайд Д.Цогтбаатар, ОБЕГ-ын дарга, хошууч генерал Т.Бадрал, “МИАТ” ТӨХК-ийн гүйцэтгэх захирал Д.Баттөр нар хийсэн юм.

 Гадаад харилцааны сайд Д.Цогтбаатар “Улсын онцгой комисс “МИАТ” ТӨХК-тай хамтраад 10-аад чартер нислэг хийлээ. Энэ нислэгүүдтэй холбоотойгоор иргэдийн дунд эргэлзээ үүсээд байгаа. Тиймээс ил тод мэдээлэл өгөх нь зүйтэй гэж үзлээ. Тусгай үүргийн нислэгээр ирж байгаа иргэдэд таван шаардлагыг тавьж байгаа. Өндөр настай, жирэмсэн, бага насны хүүхэдтэй, өвчтэй гэх мэт. .Сөүлээс ирж байгаа тохиолдлуудад дандаа дээрх шаардлагыг хангасан хүмүүс ирж байгаа. Харин бусад улсад харьцангуй цөөн хүн байгаа учраас таван шалгуур үзүүлэлтээс гадна бусад иргэд багтаад ирэх суудал гарсан. Сөүлийн эхний бүртгэлийг ЭСЯ дээр зохион байгуулсан бөгөөд ирсний дараа хоёр халдвартай тохиолдол гарсан тул эрсдэлтэй гэж үзээд утсаар бүртгэл хийж байгаа. Гэхдээ эхний нислэгийн бүртгэл хийгдэхэд л 500 гаруй хүн бүртгүүлсэн. Түрүүн хэлсэнчлэн Европоос гэхэд 15, 16 суудал хоосон байсан учраас манай улсын гурав дахь ерөнхийлөгч Москвагаас тийзээ захиалаад яваад ирсэн. Яг тийм журмаар буюу суудал байсан учраас Берлинээс ирсэн нэг оюутан ирээд халдвартай нь батлагдаж, эмчилгээ хийлгээд гарсан. Халдвар гарснаас хойш галт тэрэг болон тусгай үүргийн нислэгээр 6 000 гаруй иргэн маань эх орондоо ирсэн. Бид иргэдээ  эх орондоо авч ирэх ажлыг боломжоороо зохион байгуулна. Иргэдийн зүгээс олон хүсэлт тавьж байгаа. Нутгаасаа хол байгаа иргэддээ бүхнийг чадагч илбэчин мэт худлаа хүлээлт үүсгэхийг хүсэхгүй байна. Бид боломжийнхоо хэрээр арга хэмжээ авна. Эх орондоо ирж чадахгүй байгаа иргэддээ дэмжлэг үзүүлэх тухай саналыг ойрын хугацаанд Улсын Онцгой комиссоор хэлэлцүүлэхээр төлөвлөж байгаа. Тухайн дэмжлэг нь ямар ч хэлбэртэй байж болно” гэлээ.

ОБЕГ-ын дарга, хошууч генерал Т.Бадрал “Дэлхийн 43 улсаас 6000 гаруй иргэн эх орондоо ирэх хүсэлтээ ирүүлсэн. Шалтгаанаар ангилан үзвэл, бага насны хүүхэдтэй гэр бүл 830, эрүүл мэндийн шалтгаантай 86, өндөр настан 278, жирэмсэн 32,бага насны хүүхэд 307,оюутан 973, байрлах газаргүй болсон 409, санхүүгийн боломжгүй болсон 89 болон бусад шалтгаантай 4000 гаруй иргэн байгаа. Санхүүгийн боломжгүй болсон иргэдийн ихэнх нь Австралид байгаа монгол иргэд юм. Тэднийг хэрхэн татах талаар тус улстай холбогдох мэдээлэл солилцож байна. Урьдчилсан байдлаар дөрөвдүгээр сарын 17-нд Сөүл чиглэлд нислэг үйлдэхээр ярьж байна. Үүнд гадны бусад улсаас Сөүлд очсон иргэдээ татах талаар төлөвлөж байгаа юм” гэлээ.

“МИАТ” ТӨХК-ийн гүйцэтгэх захирал Д.Баттөр “Сөүлийн онгоцоор транзитаар явж байгаа 51 зорчигч ирсэн. Транзит нислэгээр ирж байгаа иргэдийг ХӨСҮТ-д тусгаарлах журам хэрэгжиж байгаа учраас ХӨСҮТ-ийн орны тооноос хамаараад 51 гэсэн квот тогтоосон” гэлээ гэж Онцгой байдлын ерөнхий газраас мэдээллээ.