“Эко давс”-ны үйлдвэр өдөрт 300 кг давс савлах хүчин чадалтай

“Эко давс”-ны үйлдвэр өдөрт 300 кг давс савлах хүчин чадалтай

Хөдөө орон нутагт үйлдвэрлэл эрхэлж буй зарим иргэний ажил үйлс, цаашдын зорилтын талаар сурвалжилга хүргэж байна.

Ховд аймгийн Дөргөн суманд “Эко давс”-ны үйлдвэр тогтмол үйл ажиллагаа явуулж байна.  

Аймгийн ХХҮГ-аас “Залуучуудын хөдөлмөр эрхлэлт, гарааны бизнесийг дэмжих хөтөлбөр хэрэгжүүлдэг. Тус хөтөлбөрт 2019 онд Дөргөн сумын Өгөөмөр багийн иргэн Д.Түвшинсайханы “Эко давс” төсөл анх удаа шалгарсан. Улмаар 10 сая төгрөгийн санхүүгийн дэмжлэг авчээ. Ингэснээр бүтээгдэхүүнийг сав баглаа боодолтой болгосон байна.  

“Эко давс”-ны үйлдвэрийн үйл ажиллагаа эхэлснээр гурван хүнийг ажлын байраар хангажээ

Тус үйлдвэр одоогийн байдлаар гурван ажилтантай. Тус хамт олон сумын төвөөс 45 км зайд орших Сангийн далайгаас давсаа татан авч боловсруулдаг. Уг давс нь цэвэр байгалийн гаралтай, нарийн ширхэгтэй, усанд хурдан уусах чадвартай, химийн найрлагагүй гэдгээрээ давуу талтай аж.

Тус үйлдвэр давсыг боловсруулахдаа бутлах, хатаах, савлагаа хийх зэрэг дөрвөн төрлийн тоног төхөөрөмж ашиглаж байна.

Давсыг нэг кг хэмжээтэй савлаж 700 төгрөгөөр худалддаг

Тус үйлдвэр нь Ховд, Баян-Өлгий, Увс аймгийн зарим сумын хүнсний дэлгүүрт гэрээгээр давс нийлүүлж байна. Ингэхдээ давсыг нэг кг хэмжээтэй уутанд савлаж, 700 төгрөгөөр борлуулдаг. Өдөрт 300 кг давс савлаж зах зээлд нийлүүлэх хүчин чадалтай гэнэ. Мөн давсыг хэрэглэгчийн хүссэн хэмжээгээр савлах боломжтой аж.

Цаашид  үйлдвэрлэлээ өргөжүүлж, барилгын гадна ба дотор орчинд тохижилт хийх, зарим тоног төхөөрөмж, ажлын байрыг нэмэгдүүлэхээр зорьж байна гэж ажилтан Д.Гомбо танилцууллаа.

Сэтгэгдэл

Хэрэглэгчээр нэвтэрч байж сэтгэгдэл нэмнэ үү! Энд дарж нэвтэрнэ үү.