Ерөнхий сайдын Эдийн засгийн бодлогын зөвлөхөөр 2019 оноос ажилласан Ц.Цэрэнпунцаг гарьд Завхан аймаг буюу есдүгээр тойргоос УИХ-д сонгогдоод буй.

Монгол бөхийн торгон ногоон дэвжээнээ уран мэх, хүч бяраа уралдуулан явсан тэрбээр УИХ-ын гишүүний тангараг өргөснийхөө дараа УИХ-ын гишүүн, Дархан аварга  Б.Бат-Эрдэнэд ёсолж, хүндэтгэл үзүүлэн, очиж үнсүүлсэн нь бөх сонирхогч монгол түмний сэтгэлийг хөдөлгөсөн гэхэд болно. Наадам дөхсөн болохоор бүр ч аргагүй биз.

Дашрамд дурдахад, Ц.Цэрэнпунцаг гишүүн УИХ-ын сонгуулийн сурталчилгааны үеэр “Та одоо цагийн шилдэг бөхчүүдээс хэнтэй барилдаж үзэхийг хүсдэг вэ?” гэсэн сэтгүүлчийн асуултад “Санжаадамба аварга” гэж хариулсан билээ. 

Нэгэн цагт Монгол бөхийн торгон ногоон дэвжээг өнгөлж явсан хүчит бөхийн хариулт бөх сонирхогчдод сонин байна биз ээ.