1. Монгол Улсын Ерөнхий сайдаар ажиллаж байсан УИХ-ын гишүүн асан Ж.Эрдэнэбатад зургаан жилийн ял оноосон. Түүнийг эрх мэдэл, албан тушаалын байдлаа ашиглаж бусдад давуу эрх олгосон гэх үндэслэлээр шүүж, гэм буруутаад тооцсон юм. Тэрбээр давж заалдахаа мэдэгдээд байгаа билээ.

2. Хөдөлмөр, нийгмийн хамгааллын сайдаар ажиллаж байсан УИХ-ын гишүүн асан Н.Номтойбаярт таван жил таван сарын хорих ял оноосон билээ. Түүнийг мөрдөн байцаагчийг дарамталсан, Г.Батхүү агсны хэрэгт худал мэдүүлэг өгсөн болон сайдаар ажиллаж байхдаа албан тушаалын байдлаа урвуулан ашигласан гэх үндэслэлээр ялласан юм. Тэрбээр давж заалдахаа мэдэгдсэн. 

3. УИХ дахь АН-ын бүлгийн даргаар ажиллаж байсан УИХ-ын гишүүн асан Д.Эрдэнэбат шүүхээс 4.6 жилийн ял сонссон. Түүнийг "Эрдэнэт" үйлдвэрийн 49 хувийг төрд авахын эсрэг ажилласан гэм буруутайд тооцсон. 

4. УИХ-ын гишүүн асан Г.Солтанд гурван жилийн ял оноосон. Түүнийг УИХ-ын гишүүнээр ажиллаж байхдаа Жижиг, дунд үйлдвэрлэлийг хөгжүүлэх сангаас эрх мэдэл, албан тушаалын байдлаа ашиглаж их хэмжээний зээл авсан хэрэгт буруутгасан байдаг. 

5. УИХ-ын гишүүн асан Д.Гантулгад шүүхээс хоёр жилийн ял оноосон билээ. Тэрбээр хүчингийн гэмт хэрэгт холбогдож, шүүхээс ял сонссон юм. Тэрбээр ШШГЕГ-ын харьяа хорих ангид ялаа эдэлж байна. 

6. УИХ-ын гишүүн асан Б.Ундармаад 2.8 жилийн ял өгсөн. Түүнийг Жижиг, дунд үйлдвэрлэлийг хөгжүүлэх сангаас эрх мэдэл, албан тушаалын байдлаа ашиглаж их хэмжээний зээл авсан хэрэгт буруутгасан юм. 

7. УИХ-ын гишүүн асан Д.Дамба-Очирт 3.6 жилийн ял оноосон. Түүнийг Жижиг, дунд үйлдвэрлэлийг хөгжүүлэх сангаас эрх мэдэл, албан тушаалын байдлаа ашиглаж их хэмжээний зээл авсан хэрэгт буруутгасан билээ.