БНСУ, АНУ-ын төлөөлөгчид Солонгосын хойгийн өмнөд хэсэгт Америкийн цэргүүдийг байрлуулах зардлыг хуваах тухай шинэ, 11 дэх удаагийн хэлэлцээрт пүрэв гарагт гарын үсэг зурлаа.

Гарын үсэг зурах ёслолд БНСУ-ын Гадаад хэргийн сайд Чон Ый Ён, Батлан хамгаалахын сайд Со Ук, АНУ-ын Төрийн нарийн бичгийн дарга Энтони Блинкен, Пентагоны тэргүүн Ллойд Остин нар оролцжээ.

АНУ-ын цэргүүдийг БНСУ-д байлгах зардлын талаар шинэ гэрээ байгуулах хэлэлцээ 2019 оны есдүгээр сард эхэлжээ. БНСУ-ын талаас гаргах зардлыг 13 хувиар нэмэгдүүлэх урьдчилсан тохиролцоонд талууд 2020 оны гуравдугаар сарын сүүлчээр хүрсэн боловч тухайн үеийн АНУ-ын Ерөнхийлөгч Дональд Трампын байр суурийн улмаас эцсийн тохиролцоонд хүрч чадаагүй байна.

Цэргүүдийг нь байрлуулахад гаргадаг зардлаа нэмэхийг АНУ-ын эрх баригчид 2018 оноос шаардаж эхэлжээ. БНСУ-ын гаргах зардлыг өнгөрсөн онд 8.2 хувиар нэмэгдүүлж, 1.04 их наяд вон буюу 915 сая ам.доллар болгосон байна.

АНУ-ын цэргүүд 1950-1953 оны Солонгосын дайны үеэс хойш БНСУ-д байрлаж байгаа бөгөөд цэрэг байрлуулах нөхцөлийг хоёр орны хооронд 1950 оны нэгдүгээр сарын 26-нд байгуулсан батлан хамгаалахын туслалцаа харилцан үзүүлэх тухай гэрээгээр зохицуулдаг аж.