Ромын пап Франциск БНАСАУ-д айлчлах хүсэлтэй байгаагаа дахин илэрхийлснийг БНСУ-ын хамба ламтан Ю Хён Шик өнөөдөр “Yonhap” агентлагт мэдээлжээ.

Солонгосын ард түмэн салан тусгаарлагдсанаас хойш 70 жилийн нүүр үзэж буйг Тэжон хотын Католик сүмийн хамба ламтан Ромын паптай Ватикан хотноо уулзах үеэрээ хэлсний хариуд Франциск тийнхүү хэлсэн байна. 

Ромын пап, “Миний бие Пёньянд айлчлах бэлтгэл ажил бүрэн хангагдах үед айлчлал хийх болно” хэмээн хэлснийг Ю Хён Шик уламжилжээ.

Ромын пап БНАСАУ-д айлчлах хүсэлтэй байгаагаа өмнө нь илэрхийлж байсан удаатай. Тодруулбал, 2018 онд хоёр Солонгосын удирдагчид гурван дээд хэмжээний уулзалт хийж, БНАСАУ-ын удирдагч Ким Жөн Ун, АНУ-ын Ерөнхийлөгч асан Дональд Трамп нарыг уулзсаны дараа Ромын пап Пёньянд айлчлах хүсэлтэй байгаагаа илэрхийлж байжээ.

Тухайн оны 10 дугаар сард БНСУ-ын Ерөнхийлөгч Мүн Жэ Ин Ромын паптай уулзах үеэрээ эх орондоо айлчлахыг хүссэн Ким Жөн Уны үгийг түүнд дамжуулсан юм. Ромын пап тухайн үедээ Пёньян албан ёсны урилга илгээх үед БНАСАУ-д айлчилна гэдгээ мэдэгдсэн юм.

Гэвч 2019 онд Вьетнамын нийслэл Ханой хотноо болсон Ким Жөн Ун, Д.Трамп нарын уулзалт тохиролцоонд хүрэлгүйгээр өндөрлөснөөс хойш ямар нэгэн ахиц дэвшил гараагүй байна.

Үүнээс гадна Ромын пап Тэжоны сүмийн санаачилсан вакцин хандивлах кампанит ажлын шугамаар Ватиканд 460 мянган ам.доллар хандивласанд талархал илэрхийлжээ.