Вашингтоны засаг захиргааг Пёньянтай цөмийн хэлэлцээгээ аль болох ойрын хугацаанд үргэлжлүүлэхэд нь хувь нэмрээ оруулахын тулд АНУ-тай хамтран ажиллана гэж БНСУ-ын Гадаад хэргийн яам /ГХЯ/ өнөөдөр мэдэгджээ.

“БНАСАУ-тай өрнүүлэх цөмийн хэлэлцээгээр “томоохон тохиролцоонд” хүрэхийг чухалчлахгүй ч Солонгосын хойгийг цөмийн зэвсгээс бүрэн ангижруулах арга замыг эрэлхийлнэ” гэж АНУ баасан гарагт мэдэгдсэн юм.

“БНСУ, АНУ энэ сард товлоод буй төрийн тэргүүн нарын дээд хэмжээний уулзалт, ГХ-ийн сайд нарын уулзалтынхаа үеэр БНАСАУ-ыг чиглэсэн бодлогын талаар үргэлжлүүлэн зөвшилцөнө” гэж ГХЯ-ны төлөөлөгч мэдээлжээ.

БНСУ-ын Ерөнхийлөгч Мүн Жэ Ин, АНУ-ын Ерөнхийлөгч Жо Байден нар энэ сарын 21-нд уулзаж, БНАСАУ-ын цөмийн асуудлын талаар болон Сөүл-Вашингтоны эвслийг бэхжүүлэх арга замын талаар хэлэлцэх юм.

АНУ-ын Ерөнхийлөгч асан Дональд Трамп, БНАСАУ-ын удирдагч Ким Жөн Ун нарын 2019 оны хоёрдугаар сард болсон хоёр дахь дээд хэмжээний уулзалт тохиролцоонд хүрэлгүйгээр өндөрлөснөөс хойш хоёр талын хэлэлцээ зогсонги байдалд орсон билээ.