АНУ-ын Ерөнхийлөгч Жо Байден өмнөх төрийн тэргүүний баримталж байсан БНАСАУ-ыг чиглэсэн арга барилаас татгалзана гэдгээ баасан гарагт мэдэгдээд, өмнөх Ерөнхийлөгчийн гол зорилго нь Солонгосын хойгийг “цөмийн зэвсгээс бүрэн ангижруулах” байсан гэж хэлжээ.

Тэрбээр БНСУ-ын Ерөнхийлөгч Мүн Жэ Интэй хамтарсан хэвлэлийн бага хурал хийх үеэрээ хэлэхдээ, Ерөнхийлөгч асан Дональд Трампын БНАСАУ-ын удирдагч Ким Жөн Унтай хийсэн өндөр түвшний уулзалтууд түүнийг хэн болохыг нь илтгэн харуулсан бөгөөд миний хувьд хэзээ ч тэгэхгүй гэжээ.

“Хэрэв БНАСАУ уулзалт хийхийн төлөө үүрэг амлалт өгвөл миний бие Кимтэй уулзах болно. Тэрхүү амлалт нь цөмийн зэвсгийн талаар хэлэлцээ өрнүүлэх тухай байх ёстой” гэж Ж.Байден мэдэгдсэн байна.

Д.Трамп Ким Жөн Унтай гурван удаа, тодруулбал, 2018 оны зургаадугаар сард Сингапурт, 2019 оны хоёрдугаар сард Ханойд, тухайн оныхоо зургаадугаар сард Солонгосын цэрэггүй бүсэд өндөр түвшний уулзалт хийсэн юм. Ийнхүү гурав дахь уулзалтын үеэр Д.Трамп БНАСАУ-ын хилийн дээс алхсан АНУ-ын анхны Ерөнхийлөгч болсон билээ.

Трамп, Ким нарын бүх уулзалт БНАСАУ-ыг цөмийн зэвсгээс ангижруулахад гол анхаарлаа хандуулж байсан хэдий ч Трампыг Ерөнхийлөгчийн алба хаших дөрвөн жилийн хугацаанд Ким цөмийн зэвсгийн хүчин чадлаа хоёр дахин нэмэгдүүлсэн байна.

Байден, Мүн нарын хувьд БНАСАУ-ыг цөмийн зэвсгээс ангижруулах чиглэлд үргэлжлүүлэн хүчин чармайлт гарган хамтран ажиллахаа амлажээ. Мөн Байден Элчин сайд Сун Кимийг БНАСАУ-ын асуудал хариуцсан АНУ-ын тусгай төлөөлөгчийн үүрэг гүйцэтгэхээр болсныг мэдэгджээ.

Дипломатч Сун Ким нь АНУ-аас БНСУ-д суугаас Элчин сайдаар ажиллаж байжээ. Түүнчлэн саяхан түүнийг Зүүн Ази, Номхон далайн бүсийн асуудал хариуцсан туслах нарийн бичгийн даргын албан тушаалд нэр дэвшүүлсэн байна.

Байден, Мүн нарын уулзалтын үеэр хэлэлцсэн өөр нэгэн чухал сэдэв нь “COVID-19”-ийн эсрэг хариу арга хэмжээний талаар байв.

БНСУ-д одоогоор коронавирусний вакцин хомсдох болоод байгаа бөгөөд тус улсын Өвчинд хяналт тавих, урьдчилан сэргийлэх төвийн мэдээллээр, БНСУ-ын иргэдийн долоо орчим хувь нь вакцины эхний тунг тариулжээ.

Харин Америкчуудын хувьд энэ үзүүлэлт 48 гаруй хувьтай байгааг АНУ-ын Өвчинд хяналт тавих, урьдчилан сэргийлэх төвийн мэдээлэл харуулж байна.

Үүнтэй холбогдуулан Мүн, Байден нар хэвлэлийн бага хурлын үеэрээ АНУ БНСУ-ын 550 мянган цэргийн алба хаагчийг “COVID-19”-ийн вакцинжуулалтад хамруулах нөөцөөр хангахаар болсныг мэдэгджээ.