Монгол Улсын Ерөнхийлөгчийг сонгох найм дахь удаагийн сонгууль өнөөдөр /2021.06.09/ боллоо.

Энэ удаагийн сонгуульд МАН-аас У.Хүрэлсүх, АН-аас С.Эрдэнэ, "Зөв хүн-Электорат" эвслээс Д.Энхбат нар нэр дэвшин өрсөлдлөө.

Урьдчилсан дүнгээр буюу 22:30 цагийн байдлаарх санал тооллогоор МАН-аас нэр дэвшигч У.Хүрэлсүх 694,813 хүний саналаар тэргүүлж байна. Харин "Зөв хүн-Электорат" эвслээс нэр дэвшигч Д.Энхбат 215,972 санал, АН-аас нэр дэвшигч С.Эрдэнэ 60,154 сонгогчийн санал аваад байна.   

"Зөв хүн-Электорат" эвслээс нэр дэвшигч Д.Энхбат "Сонгууль өндөрлөлөө. Манай баг, дэмжигчид маш сайн ажилласан. Бид энэ сонгуульд гэрэл гэгээ, шинэ өнгө авчирч чадсандаа баяртай байна. Сайн цаг өөрөө ирдэггүй, түүнийг авчирдаг гэдэгт итгэж бид зүтгэсэн. Монголчууд бидний сонголт мэргэн байж, улс орон минь мандан бадрах болтугай" гэв.

Сонгуулийн ирц 21:30 цагийн байдлаар 52,69 хувьд хүрч, нийт сонгогчдын 1 сая 75 мянга 938 нь санал хураалтад оролцсон талаар СЕХ мэдээлээд байна. Ийн сонгогчдын 50-иас дээш хувь нь саналаа өгснөөр аль нэг хэсэг, аймагт ирц 50 хувьд хүрсэн эсэхээс үл хамаарч, сонгууль ирцийн хувьд хүчин төгөлдөр боллоо. 

Сонгуулийн ерөнхий хороо 22:00 цагийн байдлаарх ирцийн мэдээг хараахан тасалбар болгож, зарлаагүй байна.